BLOEMFONTEIN. – ’n Vet Griek-en-Boer-troue het Bloemfonteiners behoorlik aan die gons. Dié spoggerige tradisionele Griekse troue het alles opgelewer – vuurdansers, soesji, sjampanje en oester-kroeë tot fladderende skoenlappers wat as konfetti gebruik is. Op die spyskaart was “boerekos” en tradisionele Griekse poedings, terwyl 3000 borde in egte Griekse tradisie op die dansvloer gebreek is. George Koupis, ’n plaaslike Griekse drankhandelaar, en Yolandé Hanekom, ’n boerenooientjie van Namibië, wat haar eie klerewinkel en bemarkingsonderneming in Bloemfontein besit, het Saterdag voor sowat 700 gaste ewige trou aan mekaar beloof. Die stralende bruid het gesê sy en haar man is albei plat-op-die- aarde-mense, maar hy wou seker maak dat hul troudag die “spesiaalste dag” in haar lewe is.

“Ons is albei sosiale vlinders en wou ons troue behoorlik op ’n Griekse manier vier.” Liesl Williams, trouebeplanner van Bloemfontein, het gesê dié glansryke bruilof is een van die grootste en duurste troues wat die stad nóg gesien het. Ná die seremonie in die Grieks-Ortodokse kerk het die sowat 330 skoenlappers in alle kleure, wat in spesiale koeverte gehou is, gebibber van die koue. Die gaste het gesukkel om die skoenlappers, wat van Durban gebring is, te laat fladder omdat hulle hierdie tyd van die jaar nog hiberneer. Van die gaste het grappenderwys gesê hulle het die lewensasem in die skoenlappers geblaas. ’n Aangeklamde gas het later die aand gespog dat een van die skoenlappers wat in sy motor beland het die “duurste insek” is wat hy nog in sy motor gehad het. Terwyl die gaste by die Jakkalsdraai-onthaalsentrum vir die paartjie gewag het, kon hulle in ’n massiewe tent met glasdeure heerlike Moët & Chandon-sjampanje in spesiaal ontwerpte glase met die egpaar se embleem geniet en aan soesji en oesters peusel. Altesaam 70 kelners met spesiale goue- en salmkleurige uitrustings en 16 kroegmanne, het die gaste bedien, en by die kroeg is ’n spesiale sigaarsitkamer vir die gaste ingerig. “Dit was omtrent vir jou ’n storie,” het Williams gesê. “Ons sal die spesiale dag nooit in der ewigheid kan vergeet nie,” het die bruidspaar gesê.

– Die Burger
Reporter: Christal-Lize Thomas – 02 nd September 2012 (23:14)